كشفت تحقيقات إمام عاشور، لاعب النادي الأهلي، في اتهامه بالتعدي على فرد أمن بمول أركان بالشيخ زايد تعرض زوجته للمضايقة من قبل أشخاص.
وجاءت الواقعة التي دارت أحداثها يوم 19 يونيو الماضي، بتفاصيل تعرض زوجته للمضايقة والمعاكسة داخل المول، والتي زعمت فيها زوجة عاشور تباطؤ أفراد الأمن بالإمساك بهم فقامت بإبلاغ زوجها والذي حضر وتشاجر مع أفراد أمن المول رفقة صديق له وآخرين.
ونشر موقع القاهرة 24 المحلي نص التحقيقات التي قالت خلالها زوجة إمام عاشور لاعب النادي الأهلي في القضية رقم 2684 جنح الشيخ زايد حيث في التحقيقات: اللي حصل إن يوم الأربعاء أنا كنت رايحه السينما مع إخواتي وأهلي وبعد شباك التذاكر من اليمين سمعت ناس ورايا بيقولوا دي مرات إمام عاشور شكلها.. وحجم كبير وتعدوا عليا لفظيا وتحرشوا بيا بألفاظ مش كويسة.
إمام عاشور وزوجته
وتابعت زوجة إمام عاشور لاعب النادي الأهلي في التحقيقات التي اطلع عليها دفاع إمام عاشور: بعد كدا سمعت حد بيقول للتاني تعالي وراها وطلعت على السلم الكهرباء وأخويا مشي معايا وفضلوا ورايا بيتريقوا وانا مش مركزة بيقولوا إيه واخويا مسكني من أيديا واستنيت باقي اخواتي علشان أخلي الناس اللي ضايقوني يعدوا الأول ولما أخويا الكبير جه روحنا وقفنا عند الراجل بتاع التيكت وأخدنا التيكت والشباب دي فضلت واقفة يبصوا علينا ويضحكوا ولما دخلنا القاعة مبصتلهومش وقعدوا يقولوا دي مرات إمام عاشور ويتحرشوا بيا.
وأردفت زوجة إمام عاشور بالتحقيقات: فضلوا يقولوا هي دي مرات إمام عاشور الـ … وسمعت واحد قال هتروح ازقك عليها وأصورك ودخلت جوه السينما قعدت في مكاني وكلمت إمام جوزي وانا في السينما قولت له اللي حصل عشان يتصرف.
أكملت ياسمين زوجة إمام عاشور أقوالها أمام جهات التحقيق: بعد ما الشباب دول اتحرشوا بيا كلمت إمام جوزي وانا في السينما قولت له اللي حصل علشان يكلم اخويا معاذ يهدي علشان هو متعصب وفيه ناس ضايقوني وعايز يتكلم معاهم وإمام كلمه ومعاذ حكى لإمام اللي حصل وإمام عاشور قاله متعملوش حاجه وبعد السينما روحوا قولوا لمشرفين الأمن، وقال لأخويا إنه جي علشان يروح يعمل محضر.
إمام عاشور وزوجته
أضافت زوجة لاعب الأهلي: بعد ما خلصنا سينما طلعت أنا واهلي وأخويا معاذ الصغير قال لأخويا عمر الكبير هما دول وعمر قالهم انتوا عاكستم اختي وكان معاكم واحد بجلابية وساعتها قعدوا يتريقوا ويقولولهم جلابية إيه وقعدوا يضحكوا وساعتها بتاع الأمن جه وسألنا فيه إيه.. وعمر أخويا قاله إن فيه شباب اتحرشوا بيها وشتموها ومشرف الأمن قاله عادي ومشرف الأمن قاله باستهزاء كل الناس بيحصلها كده إحنا في عيد.
وأضافت زوجة إمام عاشور، لاعب النادي الأهلي: أخويا قال لفرد الأمن أنا عايزك تتحفظ عليهم جوزها جاي وهنعمل محضر دلوقتي وساعتها مشرف الأمن قالنا سيبوا الشباب دي إحنا هنتحفظ عليهم تحت عند مكتب مدير الأمن لحد ما زوجها ييجي علشان يعمل محضر.. وانا بعدت ومعرفش عمر قال لمشرف الأمن أيه وأنا أخدت جنب وعمر أخويا أخدني أنا وإخواتي وقالنا تعالي نطلع بره لحد ما إمام جوزي ييجي.
وقالت زوجة لاعب الأهلي خلال التحقيقات: فضلنا واقفين بره قاعدين في العربية و5 دقائق وإمام عاشور جوزي جه ومعاه واحد صاحبه اسمه محمود وأخد معاذ أخويا وسأله فين الشباب اللي ضايقوا مراتي قاله تحت عند مدير الأمن وساعتها لقيت الناس في الشارع قدام المول بتتلم وجريوا ورا إمام وقاله ده إمام عاشور وكانوا عايزين يتصوروا معاه وانا فضلت واقفة بره حوالي خمس دقائق أو عشر دقائق ولقيت إمام عاشور راجع من جوه وقالي إنه نزل تحت سأل مشرفين الأمن على الشباب اللي ضايقوني وساعتها مشرفين الأمن مشوهم.
المصدر: العين
